‘Khami zan kha!’ tia
sawi tur ka va han ngah ve tawh tak em! Mahse Pathian khawngaihna a zarah a
chhe lam aiin a tha lam deuh hlir la zuk ni zui a! Ka hun liam hnu leh ka tawn
mek te ka han chhui kir a ka ngaihtuah vang vang changte hian ka vanneih bik
ziate hi ka inhrechhuak uar uar thin.
Kan thupui hman atanga
ngaihdan han siam chuan khami zan-hmangaih biahthu min hlan zan kha ka hun
tawn tawh a nuam ber a la ni--tih
lampang hawi sawi tur ni awm taka a lan laiin workcamp-a Arampate In a kan miss
Tluangi te ho nen a kan fellowship atanga ka thil tawn leh hriat thar ka sawi
daih thung dawn a ni.
Khami zan fellowship
tura buh hmun kal tlang a nih zan khan(buh hmun velah khan buai fe fe chu an
tam a, ka sawi thui lo ang, hnuaileng ho kha chuan kan hria!!) boruak chu a
nuam a ni. Amaherawhchu thlarau lamah chuan, han ti ve khanglang ila, ka khawro
ber zan ti mai ila, sawi tur ka hriat loh ber
zan a ni ang. Khami zan kha ka han ngaihtuah let mai mai thin a, kan
thut dan te, mi pawimawh ber ni awm fahranin
hotute thutna tlar, thutna nuam
ber ka la chang zui! Ka han ngaihtuaha kan tlar sir ber a thu A-pi kha nula ni
ve chiah ta sela, moneitu hi ka ang awm te ka ti a!! Khami zan bawk kha alawm
ka mangan zan em em bawk chu, ka khawro zan ber, sawi tur ka hriatloh ber zan
ka ti tawh kha. A hmingin kan group hnuaileng hruaitu pakhatah min ruat ve, Leader
berin ‘nagma’n thusawina hun nei mai rawh aw’ min ti! Thusawi ngei ngei a lo ngai
ta! Bible chang ka hriat vete kha khawnge an awm zawh tak! Ka han ngaihtuah ngial
a, pakhatmah ka hrechhuak thei lo! A tawp a tawpah kan NMI chang innghahna sam
37:5 ‘I
awmdan tur chu LALPA chungah nghat la,amah chu ring la,aman a ti vek ang’
tih kha a rawn lang hlawl a, chuan A-pi Bible chu hawhin khami chang behchhana
thusawi tur chuan ka inring ta a. Thusawi tur chuan ka ding chhuak ta, ka va
zam ve! Ka Nu tawng a thusawi tur chu nih ila, nal deuvin ka sawi thei chu ka
ring. Amaherawhchu vai tawng pawh ni lo, saptawng a sawi a ngai, chutah pawh a
ngaithla tu turte hriatthiam phak tura sawi a la ngai leh zel khan ka rilru
hahna a tibelhchhah a ni. Ka english lam nalh lohzia leh thiamlohzia pawh ka
hre reng, mahse Pathiana rinna nghat tlatin, rilru tawngtaina nen kan ti ve ta
a, ka thusawi a that leh thatloh lampang chu ka hre lo, mahse a hun tea rah
thin Pathian a nihzia a tak ngeiin ka tawngin ka hria a, saptawnga ka sawi
thiam lo thleng thlengin sawi tur ka rilru a lo lang ta! ‘Lalpa ka va lawm em’ tih
a rilru tawngtaina nen ka thutawi sawi chu ka zo ve thei ta a ni.
Khami zan a thil thleng chu ka sawi zo ta a, a
tlangkawmnan khami zan atanga ka zir chhuahte ka han tarlang leh lawk teh ang:
Ahmasaberah chuan, Bible chang hriat hnem, Pathian thu a tam thei ang ber zir
kan ngai tih hi a ni. Khami zan ka
thusawi dawn a Bible chang ka han ngaihtuah kual a, engmah a lo lang lote kha pakhatah
chuan keimaah khawl ka neih tlem lutuk vang a ni. Khami zan pawh khan, ‘Kan
chhung inkhawmnaah ka Nu in Bible chhiar hi inthlahdah suh u, tuna inthat lai hun, in vanglai hunah in hriat loh
chuan chhungkua in din hunah in fate zirtir tur in nei lovang’ a tih lai te kha
ka hrechhuak chiang khawp mai! A dawt lehah chuan ka sawi tawh ang khan, kan
Pathian hi a hun tea rah thin a nihzia ka zir chhuak chiang hle a ni. Mihring
ngaihtuahna leh ruahmanna a tawp tawh hnuah hian Pathian ropuina a lo lang
chauh thin zawk a lo ni. Ring tharte rinna chakzia kha ka zir chhuah leh chu a
ni. An rinna chakzia kha, Isua hun lai a, Isua puan hmawr dektu hmeichhe thi
put rinna nen khan a chakzia a in ang velin ka hria a ni. An rinna ah khan
rinhlelna a awmlo ni berin ka hria,chutiang bawk chuan keini pawn kan rinna hi
tih chak tum ta ila, kan thiltih kawng
engkimah hian Pathianin kan tana tha tura a tih te chu min pek hlawm ngei ka
ring tlat a ni .
A tawp berah chuan Lalpa
min hmangaihna hi a lo va han nasa tak em! Mi bawrhsawm te leh mi hnuaihnung zawkte
ka hmuh hian ka vanneihzia hi ka hrechhuak chiang hle a ni. Lalpa ah hian vuina
tur kan nei love. Amah tih lawm hi keini Krista ringtu kristian in tih te hian
kan hna ber tur chu a ni tih ka chhar chhuak a ni.
