Hman zanah keimahin film thar
ni lem lo,”The Stonning of Soraya ” tih kha ka en a; Khatia sualna nei miah lo
hmeichhia “Soraya” thiamloh an han chantir a, lung a an han deng hlum ka hmuh
khan, ka thinlung chhungril min fan a, a takin mittui tla lem lo mahse,
chhungril lamah chuan a pi kha ka tah pui ve in ka hria. Mak pawh ka in ti a,
min hneh em em chhan pakhat ni a ka hriat chu-kha hmeichhia kha ka hriatloh
hlanin, ka laina leh hmangaih te ka lo hmeh belh vang a lo ni a, tichuan a
tawpah ka thinlungah hei hian min rawn deng a- kan Lal Isua pawh kha sualna nei
miah lovin kan tan khawvel hrehawmah lo kalin kraws lerah a lo tuar a ni si a; Ka
tana A tawrhna nasatzia leh a inpekna ropuizia kha chiang takin ka hriatchian
thar phah niin ka hria a ni.
Kha film kha true story a ni
a, Iran-a an chin thin a ni a, kha film a lang ang khan, amah Soraya leh a Pi
huaisenna avanga khawvel pum puia a chanchin theh dar a awm dan,
lekhabu(International bestseller) hial a chhuah a nih tak dan leh a rah chu a
en tawh leh a chanchin hre tawh chuan kan hria ang a. Lunga an den hlum hmaa a
pi thutiam kha hei hi a ni,”He I tuarna
hi ka thamral tir mai mai lovang; Khawvel ka hriattir ang “ tih a ni. Khami
avang pawh khan amah Soraya pawh a thlamuang sawt a nih kha! Ka thinlung khawih
leh em em pakhat chu-khatia a kawng chin an phum a,a lama lung an han vawm tan
laia a rila rah a hmangaih ngawih ngawih a fate ngeiin an han deng tur a hmuh
khan, a hmel a dang a, a tuarna em em bik a ni tih kha a hmel a pawh a hmuh
thei a ni.
Kan Lal Isua kan tana a
inpekna kan hria a, kan hma lawka kan nghahhlel em em krismas lo awm tur chhan
dik tak kan hriat bawk a, a ropuina zawng zawng kal san a, bawngin tlawm taka a
lo pian dan pawh kan hria a, chutah a hun tawpa a tawrhna nasatzia pawh hretu
leh tawmpuitu vek kan ni a, chutiang zawng zawng hretu amah zuitu ni chung siin
he krismas lo thleng turah hian sual rawngbawl ta ila, kohhran hi krista taksa
a nih angina , kha film a, a faten an nu lung a an den ang tho kha kan ni dawn
a ni. Anu rilru nat nassatzia ang bawk khan kan Lal Isua pawh a rilru a va na
dawn em!!
A pi thutiam ang khan keini
pawhin kan Lal Isua tuarna hi awmze nei a kan chhuah ve a, a thlawn kan chantir
phalloh a pawimawh a, a tuarna chhan dik tak kha khawvel hriattir kan
mawhphurhna a ni. Kha film-a Soraya pi pawh khan amahin a tunu chanchin kha a
theh darh thei lo nimahse a titheitu Journalist zin vei vak lai kha a lo hmang
tangkai a nih kha. Khatiang ang aia awlsam zawkin nang leh kei phei chuan Kohhran
a rawngbawltu hrang hrang te, missionary te
leh pastor te khawvel deng chhuak khawp a chanchintha hril tura hun puia
inpe thahnem tak kan neih sa tawh a, kan theih anga pui a, an rawngbawlna ti
dal tu ni lova, kan theih ang tawka tichaktu nih hi kan tih tur leh kan
mawhphurhna a ni.
“I rawngbawlna kha
hlen rawh” II Timothea 4:5
[NB: He article hi ka ziah thiam avang emaw a ziak
ka ni lova, ka rilruah a awm reng avangin last minute ah kan college Mizo
chanchinbu-NMI Kantu- a chhuah atana ka ziah ani. He ka post , Zo tawng bah
nuaiha a ziah hi lo chhiar a, lo hlawkpui te in awm hlauh chuan Pathian chu
chawimawiin awm rawhse. To preserve my little work, I keep this article as
original- in native language]
